Спорт алаңы ашылды

25.10.201815740
3333-1280x853.jpg

Елбасымыз Н.Назарбаевтың «Болашаққа бағдар: рухани жаңғыру» атты мақаласы аясында Кеген ауданындағы Саты ауылында көк майсасы төселген, заманауи тамаша футбол алаңы ашылды. Бұл шын мәнінде шалғай ауылда спортты дамытуға жасалынып отырған қолайлы мүмкіндік. Енді ауыл жастары, мектеп қабырғасында өсіп келе жатқан жас ұрпақ спорт алаңында уақыттарын мәнді де мағыналы өткізіп тұратын болады.

Кеген ауданының әкімі Талғат Байедилов, облыстық мәслихаттың депутаты Аян Айтжанов, Бейжің олимпиадасының күміс жүлдегері, облыстық дене шынықтыру және спорт басқармасының басшысы Нұрбақыт Теңізбаев футбол алаңының лентасын қиып, ауыл тұрғындарына, спорт сүйер жастарына құтты болсын айтты.

Осынау қуанышты оқиға Саты ауылының тумасы, ұлағатты ұстаз, спорт жанашыры Өмірхан Асылбековты еске алуға арналған шағын футболдан турнирге ұласты. Асылбековтер әулетінің атынан Айдын Асылбеков сөз алып, футбол алаңының ашылу салтанатының еске алу турниріне ұластыруға қолдау көрсеткен азаматтар атына алғысын білдірді.

Бірнеше сағаттарға созылған жарыстың қортындысында Талдықорған командасы 1 орынды жеңіп алды. Жаркент командасы 2 орынды иеленсе, Жалаңаш ауылының командасы 3 орыннан көрінді. Кеген ауданы әкімі аппаратының командасы 4 орынды еншіледі. Жарыс жеңімпаздарының барлығына кубок, диплом, қаржылай, заттай сыйлықтар тапсырылды. Оның жүгін Өмірхан Асылбековтердің ұрпағы көтеріп алды. Сөйтіп, Саты ауылының орталығына көрік берген жаңа футбол алаңының ашылуы дүбірлі жарысқа ұласып, көпшілік бір желпінісіп қалды. Әсіресе, ауыл жастарының қуанышын айтсаңызшы?! Қуаныш ұзағынан сүйіндіре берсін!

Пікір қалдыру

Сіздің электронды поштаңыз жарияланбайды. Қатарды міндетті түрде толтырыңыз *