АРДАГЕРЛЕР КҮМІСПЕН КҮПТЕЛДІ

06.12.201810120
IMG_9610-1280x853.jpg

 

            Астанадағы «Зодиак» және «Азия» бильярд клубында ҚР Тұңғыш Президенті күніне арналған бильярд спорт түрінен «Еуразияның Үлкен Кубогы» атты ардагерлер арасындағы халықаралық турнир өтті. Жарысқа 19 команда 140 спортшы қатысты.

Атап айтсақ Ресейдің «Омск», Астананың «Астана қырандары», Өскеменнен «Асау Ертіс», Шымкент қаласы «13 аймақ», Алматының «НАП» және «Бірлік», Атыраудан «Батыс», Семей қаласының, Ақмола облысынан «Көкшетау арландары» командасы, Қарағанды, СҚО және облысымыздың намысын қорғаған «Жетісу» командасы бақ сынасты. Аталмыш турнир «Ұлы  Дала Қырандары»  республикалық   қоғамдық   әлеуметтік,  мәдени  және  спорттық   қозғалысы,   ҚР Мәдениет және спорт министрлігінің Спорт және дене шынықтыру істері комитеті, «Астана   қырандары» командасы, Астана қаласының Дене шынықтыру және спорт басқармасы мұрындық болуымен өткенін де айта кеткеніміз жөн.

Шарада ҚР Мәдениет және спорт Министрлігінің спорт және дене шынықтыру істері жөніндегі комитетінің төрағасының бірінші орынбасары Бекболат Байжанов сөз алып, жарыстың мақсатын айтып, жарысты ашық деп жариялады. Өз кезегінде сөз алған жарыстың ұйымдастырушысы әрі инциаторы, Қазақстан Республикасының еңбек сіңірген қайраткері Сәдібек   Түгел, турнирдің бас төрешісі Ерболат Жұмағұлов және аталмыш доданы ұйымдастыру комитетінің төрағасы Қайрат Мирашев тастаяқ шеберлеріне сәттілік тіледі.

Үш күнге созылған дода тартысты өтті. тастаяқ ойынының шеберлері барын салып өнер көрсетіп, бильярд бәсекесінің озық үлгісін көрсетті.

Турнирдің қорытындысы бойынша 50-63 жас аралығында жалпыкомандалық  есепті I орынды «Астана қырандары» командасы жеңіп алса, II орынды ШҚО «Асау Ертіс» командасы қанжығасына байлады. III орынды Шымкент қаласының «13 аймақ» командасы иеленді.

63 жастан жоғары спортшылар арасында Шымкент қаласының «13 аймақ» командасы топ жарды. II орынды  облысымыздың намысын қорғаған «Жетісу» командасы иемденді. III орын Алматы қаласының «Бірлік» командасына бұйырды. Күміс жүлдегер атанған 63 жастан жоғары спортшылар арасында белгілі спорт журналисті, Қазақстанның еңбек сіңірген қайраткері Несіп Жүнісбайұлының бар екенін де айта кеткеніміз жөн.

50-63 жас аралығындағы жекелей сында 1-орынды Марат Карбаев (Алматы облысы) олжаласа, Сайлаубек Мусинов (ШҚО) тұғырдың екінші сатысынан көтерілді. Ал Қайрат Жақанов (Алматы қаласы) үздік үштіктің қатарынан көрінді. 63 жастан жоғары санатта 1-орынды Еркін Тлеуғабылов (Шымкент қаласы), 2-орынды Ли Анатолии (Қарағанды қаласы), 3-орынды Рыжих Николай (ШҚО) жеңіп алды. Сонымен қатар «Ең үздік техникалық ойыншы» аталымын Жұмағулов Тоқтамыс («Батыс» командасы), «Ақсақал ойыншы» аталымын Пак Георгий («13 аймақ» командасы), Марат Доскожин («Астана қырандары» командасы) ойыншысы иеленсе, «Жеңіске деген құштарлық» аталымын Орман Қамзабаев («Астана қырандары» командасы ойыншысы), Иля Ильин және Ерғанат Қайыпов, «Көкшетау арландары» командасының ойыншысы Қайрат Кәкімов иеленді. Жарыс соңында жеңімпаздар мен жүлдегерлерге кубок, медальдар мен дипломдар табысталды.

 

Пікір қалдыру

Сіздің электронды поштаңыз жарияланбайды. Қатарды міндетті түрде толтырыңыз *