2026 жылдың 1 қаңтарынан бастап Қазақстан азаматтары бірінші рет жеке куәлік алған кезде мемлекеттік баж төлемейді. Бұл туралы Ішкі істер министрлігі Көші-қон қызметі комитетінің төрағасы Аслан Аталықов мәлімдеді.
Оның айтуынша, бастама Ішкі істер министрлігі тарапынан көтерілген және бұған дейін болмаған әлеуметтік маңызды шешімдердің бірі саналады.
«2026 жылдың 1 қаңтарынан бастап бірінші рет жеке куәлік алатын азаматтар құжатты тегін рәсімдей алады. Сонымен қатар жеке куәлігінің қолданылу мерзімі өтіп кеткен азаматтар да оны ақысыз ауыстыру мүмкіндігіне ие болады», – деді Аслан Аталықов.
Комитет төрағасының сөзінше, бұл қадамның басты мақсаты – азаматтарға қолайлы жағдай жасап, құжат рәсімдеуге байланысты қаржылық жүктемені азайту.
Осылайша, елімізде алғаш рет жеке куәлік алып отырған азаматтар үшін мемлекеттік баж алынып тасталады.