Ақтау технологиялық қызмет көрсету колледжі биылғы жаңа оқу жылынан бастап жаңа қарқынмен дамуға бет алды. Колледж директоры болып тағайындалған Ілес Нұрадинов оқу орнын басқаруда жаңашыл көзқарас танытып, білім беру үдерісін тұлғалық және кәсіби даму кеңістігіне айналдыруды басты мақсат етіп отыр.
Ұжымдағы мәдениет жаңарып, командалық рух күшейді
Ілес Нұрадинов басшылыққа келген күннен бастап колледждің ішкі мәдениетінде айтарлықтай өзгерістер байқалды. Ұжым ішінде ашық диалог, өзара сенім мен қолдау күшейіп, педагогтердің де, студенттердің де дамуына жағдай жасалды. Директордың айтуынша, қолайлы орта қалыптасқанда ғана мұғалімнің кәсібилігі артып, студенттердің өз қабілетін көрсетуге мүмкіндігі болады.
Алғашқы екі айдағы жетістіктер
Басшылар ауысқаннан кейін колледж оқытушылары мен білім алушылары түрлі деңгейдегі байқауларда жоғары нәтижелер көрсетті:
«Astaufest-25» халықаралық гастрономиялық фестивалінде колледж студенттері I және II орындарды иеленді.
«Abilympics-2025» чемпионатында студенттер жүлдегер атанып, инклюзивті білім берудің нәтижесін көрсетті.
ШҚО-да өткен Республикалық кәсіби шеберлік форумында өндірістік оқыту шеберлері Аймүгүл Жарылғасова мен Жанна Нысанбаева жүлделі орындарға ие болды.
Колледж базасында республикалық конкурстар өткізілді
2025 жылы колледжде «Цифрлық модельер» құзыреттілігі бойынша республикалық кәсіби шеберлік конкурсы ұйымдастырылды. Байқауда колледж оқытушысы I орынды жеңіп алды.
Шара аясында өткен «Fashion Lab: дәстүр мен цифрлық 3D технологияның тоғысында» воркшопында педагогтер мен оқушылар 3D модельдеу, виртуалды тігін үдерістері және сәндік кестелеу бойынша тәжірибе алмасты.
WorldSkills жүйесіне енгізілген жаңа құзыреттілік
Колледждің бас сарапшысы Айнат Қабдулинаның бастамасымен «Цифрлық модельер» құзыреттілігі WorldSkills чемпионатына ресми енгізілді. Бұл оқу орнының fashion-технология саласындағы беделін арттырып, студенттердің халықаралық стандарттарға сай білім алуына мүмкіндік берді.
«Жас маман» жобасы аясында колледж толық автоматтандырылған зертханалармен жабдықталып, «Тігін өндірісі және киім үлгілеу» мамандығы бойынша аймақтық құзыреттілік орталығына айналды.
Жаңа оқу ғимараты және болашақ жоспарлар
Ілес Нұрадиновтың бастамасымен колледжге жаңа оқу ғимаратын салу жобасы әзірленді. Жаңа корпус заманауи технологиялармен жабдықталған шеберханалар мен оқу кабинеттерін біріктіретін инновациялық орталық болмақ.
Колледждің негізгі стратегиялық қадамдарының бірі – автоматтандырылған тігін өндірісі цехын іске қосу. Бұл бағытта Қырғызстаннан арнайы маман шақырылып, оқытушыларды жаңа үлгідегі цифрлық машиналарда жұмыс істеуге оқыту жоспарланып отыр.
Колледж – инновация мен жаңа мүмкіндіктер алаңы
Ілес Нұрадиновтың айтуынша:
«Колледжді дамыту – ұжымды тыңдап, бірлескен мақсатты айқындаудан басталады. Әр педагог пен студент өз әлеуетін іске асыра алатын орта құру – басты міндетіміз».
Бүгінде Ақтау технологиялық қызмет көрсету колледжі заманауи білім мен өндірістік тәжірибені ұштастырған, жаңа жобалар мен инновацияларды қолдайтын оқу орнына айналып келеді.