13-15 қыркүйекте NU-да ValEUs Зерттеу желісінің бірінші жыл сайынғы ғылыми конференциясы өтті. ValEUs желісі — Еуропалық Одақ бірлесіп қаржыландыратын және 17 түрлі елдердің 20 университетінен тұратын консорциум. Конференция барысында 40-тан астам ғалым, соның ішінде Либертас университеті, Харьков ұлттық университеті, Ыстанбұлдағы Білге университеті, Питтсбург университеті және т.б. оқу орындарының өкілдері еуропалық құндылықтардың мәні, Еуропалық одақтың сыртқы саясаты қалай анықталатыны және оның қандай қиындықтарға тап болатыны туралы еңбектерін ұсынды.
Конференцияда сондай-ақ құндылықтар жаһандық динамиканың қалыптасуында шешуші рөл атқаратын заманауи геосаяси «ұлы ойынның» орталығында орналасқан Орталық Азияны қоса алғанда, әртүрлі аймақтардағы құндылықтарды қабылдау мәселелері талқыланды.
«Қазір еуропалық ұстанымдар бұдан 10-15 жыл бұрынғыдай тартымды болмай қалғаны туралы көп айтылып жүр. Елдер енді Еуропалық Одақ не істегенін үлгі етуге тырыспайды. Олар еуропалық тәсілдерден, даму жолдарынан және т.б. алшақтаған кезде кері процесс жүріп жатыр, сондықтан осының аясында конференцияның тақырыптары өзекті болып табылады. Бұл Қазақстан үшін де маңызды, ішінара еуропалық құндылықтар, оның ішінде адам құқығы, демократия, экологиялық стандарттар – осы стандарттардың барлығы біздің құжаттарымызда жазылған, сондықтан конференция біз үшін де өзекті», — деп атап өтті Жоғары мемлекеттік саясат мектебінің ассистент профессоры Жәнібек Арынов.
NU Саясаттану және халықаралық қатынастар кафедрасының қауымдастырылған профессоры және Қазақстандағы жоба координаторы Жан-Франсуа Карон атап өткендей, консорциумға қатысу 20 университет студенттеріне бірлескен гранттық зерттеулер жүргізуге және ғылыми ынтымақтастық орнатуға мүмкіндік береді. Сондай-ақ NU жетекші зерттеу университеті ретіндегі рөлін күшейтеді.
«Виадрина Еуропалық университеті басқаратын ғылыми-зерттеу консорциумы біздің оқытушылар мен студенттерге алдағы 3 немесе одан да көп жыл ішінде әлемнің ондаған ғалымдарымен бірлескен зерттеулерді дамытуға, симпозиумдарға қатысуға, ғылыми мақалалардың бірлескен авторы ретінде қатысуға, сондай-ақ докторанттарға консорциумға кіретін мекемелерде ғылыми зерттеулер жүргізуге мүмкіндік береді», — деді профессор Карон.
Келесі жылы конференция Хорватияның Загреб қаласында өтеді. Сондай-ақ консорциум Түркия, Дания және Мексикада студенттер үшін жазғы мектептер ұйымдастыруды көздеп отыр.