Қазақстанда интернет-алаяқтықтың саны күрт өсіп, биылғы алғашқы алты айда 25%-ға артқан. Бұл туралы Бас прокурор Берік Асылов депутаттардың сауалына берген ресми жауабында айтты, деп хабарлайды bairak.kz.
Жалпы жағдай қандай?
Берік Асыловтың мәліметінше, алаяқтықтың жалпы саны 0,7%-ға төмендеген — 22 812-ден 22 644-ке дейін қысқарған. Алайда интернет арқылы жасалатын алаяқтық түрлері, керісінше, 9 936-дан 12 390 жағдайға дейін артып отыр.
«Бұл өсім құқықбұзушылықтарды нақты саралау мен статистикамен жасалатын манипуляциялардың алдын алу бағытындағы бақылаудың күшеюіне байланысты», – деді Бас прокурор.
Киберқылмысқа қарсы қандай шаралар қабылдануда?
-
30-дан астам киберқылмыстық топ анықталды;
-
93 дроппер (қылмыскерлердің атынан әрекет ететін адамдар) қылмыстық жауапкершілікке тартылды;
-
100-ден астам азаматтың өз еркінсіз несиелер рәсімдегені анықталып, олар жәбірленушілер тізімінен шығарылды;
-
«Антифрод-орталық» арқылы 23 мың алаяқтық әрекет тоқтатылып, 1,8 миллиард теңгеден астам қаражат бұғатталды;
-
697 дропперден 1 миллиард теңгеден астам қаржы жәбірленушілерге қайтарылды;
-
2 716 жәбірленушіге берілген 3,3 миллиард теңгенің несиесін орындау тоқтатылды.
Алдын алу шаралары
Интернет-алаяқтықтың алдын алу үшін өңірлік прокуратуралар уәкілетті органдармен бірлесіп келесі ақпараттық және алдын алу науқандарын жүргізіп жатыр:
-
«Тоқта – алаяқ»
-
«Кибертрон»
-
«Интернет-алаяқтықтың алдын алу»
-
«Кибер-қалқан. Алаяқтықпен күрес»
-
«Кибер-волонтер»
-
«IT TERGEU»
-
«Абайлаңыз: алаяқ!»
Бұл шаралар халықтың киберқауіпсіздікке қатысты хабардарлығын арттыруға және алдын алуға бағытталған.