Үндістан жағалауында бірнеше айдан бері қамауда тұрған MT UNITY мұнай танкерінің бортында Қазақстан азаматы бар. Қазақстанның Сыртқы істер министрлігі отандасымызды елге қайтару үшін Үндістан билігімен жұмыс жүргізіп жатқанын мәлімдеді.
Камерун туы астында жүзетін MT UNITY танкері 11 мамырдан бері Үндістанның Парадип порты маңындағы зәкірлік тұрақта тұр. Кемеде барлығы 23 теңізші бар: 20 Ресей азаматы, екі Мысыр азаматы және бір Қазақстан азаматы.
Танкер неге қамауға алынды?
Қазақстан СІМ ресми өкілі Жанболат Үсеновтің мәліметінше, кеменің ұсталуына кеме иесінің жергілікті отын жеткізуші алдындағы қаржылық берешегі себеп болған.
Басқа деректерде даудың Біріккен Араб Әмірліктерінде тіркелген компаниялар арасындағы қаржылық міндеттемелерге байланысты екені айтылады. Тараптардың бірі сотқа жүгінгеннен кейін танкерге шектеу қойылған.
Кеме Парадип портынан шамамен 10 шақырым жерде тұр. Танкерге айлаққа кіруге рұқсат берілмеген. Сонымен қатар кеме жөндеуді қажет ететіндіктен, әзірге сапарын жалғастыра алмайды.
Қазақстан СІМ не дейді?
Сыртқы істер министрлігі Қазақстан азаматын елге қайтару бойынша дипломатиялық шаралар қабылдап жатқанын хабарлады.
«Қазақстандық дипломаттар азаматымызды репатриациялауды қамтамасыз ету үшін қажетті шараларды қабылдап жатыр. Үндістан Сыртқы істер министрлігіне жағдайды реттеуге жәрдем көрсету туралы тиісті дипломатиялық нота жолданды», – деді СІМ ресми өкілі Жанболат Үсенов 17 қыркүйекте.
Оның айтуынша, Қазақстан азаматы да, оның отбасы мүшелері де бұған дейін Қазақстанның дипломатиялық өкілдіктеріне көмек сұрап жүгінбеген.
СІМ бұл жағдай министрліктің бақылауында екенін мәлімдеді.
Теңізшілер неге кемеден кете алмай отыр?
Экипаж мүшелерінің елге қайтуына кеменің қамауда болуы ғана емес, оларды алмастыратын жаңа экипаждың келмеуі де кедергі болып отыр.
Үндістан тарапы қазіргі теңізшілер кемеден кетпес бұрын танкердің қауіпсіздігін қамтамасыз ететін ауысымдық экипаж келуі керек деген талап қойып отыр. Әзірге жаңа экипаж келген жоқ.
Осыған байланысты Қазақстан азаматын қоса алғанда, 23 теңізші танкер бортында қалуға мәжбүр.
Экипажды репатриациялау мәселесімен сақтандыру компаниясы да айналысып жатыр. Компания Үндістанның Орисса штатының Жоғарғы сотына жүгінген. Іс бойынша кезекті сот отырысы 21 қыркүйекке белгіленген.
Азық-түлік қыркүйектің соңына дейін жетуі тиіс
Ресейдің Калькуттадағы Бас консулдығының мәліметінше, 19 тамызда танкерге азық-түлік пен ауызсудың кезекті қоры жеткізілген. Капитанның есебі бойынша, бұл қор қыркүйек айының соңына дейін жетуі тиіс.
Бұған дейін теңізшілердің туыстары кемеде азық-түлік пен ауызсу тапшылығы болғанын, сондай-ақ байланысқа шығуда қиындықтар туындағанын хабарлаған.
Экипаждың кейбір мүшелері танкерде 10 айдан астам уақыттан бері жүр. Бірқатар теңізшінің еңбек келісімшарты аяқталған, ал кейбірінікі қыркүйекте аяқталады.
Қазіргі уақытта MT UNITY Парадип порты маңындағы зәкірлік тұрақта қалып отыр. Қазақстандық дипломаттар Үндістан тарапымен келіссөз жүргізіп, Қазақстан азаматын елге қайтару мәселесін шешуге күш салып жатыр.