Қаржы министрлігі 2026–2028 жылдарға арналған республикалық бюджет жобасын жариялады. Құжат министрлер кабинетінде мақұлданып, Парламентке жолданды. Онда зейнетақы, ең төменгі күнкөріс деңгейі мен айлық есептік көрсеткіш (АЕК) сияқты негізгі әлеуметтік параметрлер көрсетілген, деп хабарлайды bairak.kz.
Жобаға сәйкес, 2026 жылдан бастап негізгі қаржылық көрсеткіштер төмендегідей болады:
-
АЕК (айлық есептік көрсеткіш) – 4 325 теңге (2025 жылы – 3 932 теңге);
-
ең төменгі зейнетақы – 69 049 теңге (2025 жылы – 62 771 теңге);
-
базалық зейнетақы төлемі – 35 596 теңге (2025 жылы – 32 360 теңге);
-
әлеуметтік төлемдерге арналған ең төменгі күнкөріс деңгейі – 50 851 теңге (2025 жылы – 46 228 теңге).
АЕК-тің өсуі айыппұлдар мен мемлекеттік баждардың, сондай-ақ салықтардың көлеміне тікелей әсер етеді. Әлеуметтік төлемдер де осы көрсеткіштерге байланысты өседі.
Қазір бюджет жобасы Парламент қарауында. Мәжіліс пен Сенат құжатқа түзетулер енгізуі мүмкін, бірақ негізгі әлеуметтік параметрлер әдетте өзгеріссіз қалады. Жыл соңына дейін заң қабылданып, Президент қол қойғаннан кейін, ол 2026 жылғы 1 қаңтардан бастап күшіне енеді.
Үкімет болжамынша, 2026 жылы зейнетақы мен жәрдемақы алушылардың саны шамамен 300 мың адамға артады. Сонымен қатар студенттердің стипендиясы көтеріліп, мемлекеттік білім гранттарының саны 19 мыңға ұлғаяды. Мемлекет міндетті әлеуметтік медициналық сақтандыру жүйесін де қаржыландыруды жалғастырады.