Қазақстанда мемлекеттік тұрғын үй кезегінде тұрған 200 мыңға жуық азамат есептен шығарылуы мүмкін. Бұл туралы «Отбасы банк» өкілі тұрғын үйдің қолжетімділігіне арналған конференцияда мәлімдеді.
Банк өкілінің айтуынша, 14 қыркүйектен бастап тұрғын үй кезегінде тұрған азаматтардың деректері олардың жеке келісімінсіз тексеріле бастады. Түгендеу барысында кейбір азаматтардың баспанасы бар екені, тіпті жекелеген адамдардың меншігінде 10 немесе одан да көп пәтер тіркелгені анықталған.
Тұрғын үй кезегінен шығарудың негізгі себептері:
-
Азаматтың жеке меншігінде тұрғын үйінің болуы;
-
Бұрын мемлекеттік бағдарлама арқылы баспанамен қамтамасыз етілуі;
-
Ипотекалық несие алып, тұрғын үй сатып алуы;
-
Қазақстаннан көшіп, ел азаматтығынан айырылуы.
«Отбасы банк» өкілдері азаматтардың табыс деңгейі тұрғын үй кезегінен шығаруға негіз болмайтынын атап өтті.
Қазірдің өзінде 30 мыңнан астам адамға қатысты кезектен шығару жұмыстары жүргізілген. Олардың шамамен 20 мыңы бұрын ипотека арқылы баспаналы болғанымен, тұрғын үй кезегінде қалып қойған.
Кезектен шығарылған азаматтардың жеке кабинетінде «Тоқтатылған» деген мәртебе көрсетіледі. Егер мәліметтер қате болса, азаматтар тиісті мемлекеттік органдарға жүгініп, деректерін түзете алады.
Қазіргі уақытта Қазақстанда 1 миллионнан астам азамат тұрғын үй кезегінде тұр. Олардың шамамен 480 мыңы әлеуметтік осал топтарға жатады.
Маңыздысы: 200 мың адамның барлығы бірден кезектен шығарылды деген сөз емес. Бұл – тексеру нәтижесінде есептен шығарылуы мүмкін азаматтардың алдын ала саны.