1 желтоқсаннан бастап Қазақстанда бірқатар жаңа ережелер мен жаңашылдықтар күшіне енеді. Олар автокөлік нарығына, әуе қатынасына, туризмге, денсаулық сақтау саласына және азаматтардың күнделікті өміріне тікелей әсер етеді.
Автокөлікке лизинг: жеке тұлғаларға жаңа мүмкіндік
Жеке тұлғаларға арналған автолизинг бағдарламасы ресми түрде іске қосылады. Енді азаматтар автокөлікті ұзақ мерзімге жалға алып, кейін оны толық сатып алуға немесе автосалонға қайтаруға мүмкіндік алады. Лизинг шарттары әр компанияда жеке белгіленеді: төлем мерзімі, сыйақы мөлшерлемесі, айыппұл көлемі және пробег шектеулері әртүрлі болады. Бұл бастама автонесиеге балама ретінде автонарықтағы сұранысты арттыруға бағытталған.
Әуе қатынасында жаңа бағыттар ашылады
Желтоқсан айынан бастап бірнеше халықаралық және өңіраралық әуе рейстері іске қосылады:
Thai AirAsia X Бангкок – Алматы бағыты бойынша аптасына 4 рет тікелей рейс орындайды;
SCAT авиакомпаниясы Түркістаннан Бухара, Үргеніш және Самарқандқа тұрақты ұшуларды бастайды;
FlyArystan 1 желтоқсаннан 31 наурызға дейін Астана – Үрімжі бағытын қайта іске қосады;
18 желтоқсанда Belavia Минск – Алматы әуе қатынасын қалпына келтіреді;
14 желтоқсаннан бастап Алматы – Ташкент жолаушылар пойызы күн сайын қатынайды. Жол жүру уақыты – 17 сағат 38 минут.
Бұл бағыттар өңіраралық байланыстарды нығайтуға, туризмді дамытуға және жолаушылар тасымалының қолжетімділігін арттыруға мүмкіндік береді.
Дәрілік заттарды тіркеу тәртібі өзгерді
1 желтоқсаннан бастап Денсаулық сақтау министрлігінің дәрілік заттарды тіркеу тәртібіне қатысты жаңа ережелері күшіне енеді:
Қазақстаннан тыс жерде өндірілген дәрі-дәрмек 5 жыл мерзімге тіркеледі;
Қазақстанда өндірілген дәрілік заттар мен барлық медициналық бұйымдар мерзімсіз тіркеуге ие болады.
Бұл өзгеріс отандық фармацевтика өндірісін қолдауға және медициналық өнімдердің қолжетімділігін арттыруға бағытталған.
Қайыңды көліне апаратын жаяу соқпақ қайта ашылады
Жөндеу жұмыстарынан кейін Қайыңды көліне апаратын қысқа жаяу жол туристер үшін қайта қолжетімді болады. Бұл жаңашылдық табиғат аясындағы демалысты жеңілдетіп, өңірге келетін туристер санын көбейтуге ықпал етеді.