Бұл туралы ҚР Президентінің кеңесшісі – Баспасөз хатшысы Руслан Желдібай әлеуметтік желідегі парақшасында мәлімдеді, деп хабарлайды bairak.kz.
«Бағанашыл» балалар үйінің тәрбиеленушілерін Алматыдан Қонаев қаласына көшіруге байланысты жағдаймен танысқан Қасым-Жомарт Тоқаев Алматы қаласының әкімі Дархан Сатыбалдыға оқушылардың оңтүстік астанада білім алуын жалғастыру үшін балалар үйіне жөндеу жұмыстарын жүргізуді және аталған нысанды қаланың балансына алуды тапсырды.
Сондай-ақ Руслан Желдібай Мемлекет басшысының тапсырмасына сәйкес, балалар үйі Алматыдан Қонаев қаласына көшірілмейтінін хабарлаған.
Аталған жағдайға байланысты Президент Әкімшілігі қызметтік тексеріс жүргізеді. Ата-анасының қамқорлығынсыз қалған балалардың заң шеңберіндегі барлық құқығы толық сақталады.
Айта кету керек, «Бағанашылдағы» балалар үйіне қатысты жағдай наурыз айында басталған болатын.