Қазақстанда көлік иелерінің азаматтық-құқықтық жауапкершілігін міндетті сақтандыру бойынша төлем жасау тәртібіне өзгерістер енгізіледі.
Енді сақтандыру өтемақысы тек қолма-қол ақшасыз түрде, яғни зардап шеккен азаматтың банк шотына аударылады.
Қаржы нарығын реттеу және дамыту агенттігінің мәліметінше, тиісті түзетулер қаржы нарығын цифрландыруға бағытталған заңдар аясында қабылданған. Өзгерістер «Міндетті сақтандыру туралы» заңның 25-бабын қамтиды.
Жаңа талап бойынша сақтандыру компаниялары көлік иелерінің міндетті сақтандыруы аясындағы төлемдерді бенефициарлардың банктік шоттарына тікелей аударады. Осылайша сақтандыру өтемақысын қолма-қол ақша түрінде алу тоқтатылады.
Реформаның негізгі мақсаты – сақтандыру төлемдерінің ашықтығын арттыру, жүргізушілердің құқықтарын қорғау және сақтандыру жағдайларын реттеу барысында күмәнді қаржылық схемалардың алдын алу. Қолма-қол ақшасыз есеп айырысу өтемақының тікелей зардап шеккен тарапқа түсуін қамтамасыз етуге тиіс.
Маңызды өзгерістің тағы бірі – банк комиссиялары жүргізушінің есебінен алынбайды. Ақшаны аударуға немесе шотқа есептеуге байланысты комиссиялар мен өзге де шығындарды сақтандыру компаниясы өзі өтейді. Сондықтан зардап шеккен азамат өзіне тиесілі сақтандыру төлемін толық көлемде алуы керек.