Жетісу облысында Алматы – Өскемен автожолында болған жол-көлік оқиғасы салдарынан бес адам қаза тауып, тағы екі адам түрлі жарақатпен ауруханаға жеткізілді.
Облыстық полиция департаментінің мәліметінше, қайғылы оқиға 26 маусым күні кешкі уақытта Алматы – Өскемен тасжолының 432-шақырымында екі автокөліктің қатысуымен болған.
«Жол апаты салдарынан оқиға орнында екі жүргізуші мен үш жолаушы көз жұмды. Тағы екі жолаушы түрлі дене жарақаттарымен медициналық мекемеге жеткізілді», – деп хабарлады Жетісу облысы полиция департаментінің баспасөз қызметі.
Аталған дерек бойынша қылмыстық іс қозғалды. Қазіргі уақытта оқиғаның мән-жайы мен себептерін анықтауға бағытталған сотқа дейінгі тергеу амалдары жүргізіліп жатыр.
Полиция жүргізушілерді жол қозғалысы ережелерін қатаң сақтауға, қауіпсіз жылдамдықты таңдауға, арақашықтықты сақтауға және рөлде барынша мұқият болуға шақырды.