Қытайдың Нарықты реттеу жөніндегі мемлекеттік басқармасы (SAMR) өзін OpenAI-дың ChatGPT және DeepSeek қызметтері ретінде таныстырған бірқатар компанияға айыппұл салды. Олар пайдаланушыларды әдейі жаңылыстырып, жалған сервистер арқылы пайда табуға тырысқан.
AZƏRTAC агенттігінің мәліметінше, бұл шешім жасанды интеллект саласындағы жосықсыз бәсекелестік пен зияткерлік меншік құқықтарын бұзуға қарсы жүргізіліп жатқан жүйелі шаралардың бір бөлігі саналады.
Атап айтқанда, Tencent Holdings компаниясына қарасты WeChat суперқосымшасында жалған ChatGPT сервисін іске қосқаны үшін Shanghai Shangyun Internet Technology компаниясы 62 692,70 юань (шамамен 9 034 АҚШ доллары) көлемінде айыппұл төлеуге міндеттелді.
SAMR таратқан ресми хабарламада аталған сервис өзін OpenAI әзірлеген чат-боттың Қытайдағы ресми нұсқасы ретінде көрсетіп, тұтынушыларды адастырғаны және жасанды интеллект арқылы сөйлесу үшін ақы алуға мәжбүрлегені айтылған. Бұл әрекет Қытайдың жосықсыз бәсекелестікке қарсы заңнамасына қайшы келеді.
Сонымен қатар Hangzhou Boheng Culture Media компаниясы DeepSeek платформасын «жергілікті түрде орналастыру» қызметін ұсынамыз деген желеумен рұқсатсыз веб-сайт ашқаны үшін 30 мың юань (шамамен 4 323 доллар) айыппұлға тартылды.
Тексеру барысында алаяқ сайтта ресми DeepSeek платформасына барынша ұқсас қаріптер, логотиптер мен бет дизайны қолданылғаны анықталған.