Қазақстан Ресейдің үш өңірінде мектеп салуды жоспарлап отыр. Бұл туралы ҚР Премьер-министрінің орынбасары – Ұлттық экономика министрі Серік Жұманғарин мәлімдеді.
Министрдің айтуынша, бұған дейін Ресей Қазақстанның Түркістан, Қызылорда және Жамбыл облыстарында үш мектеп салу туралы бастама көтерген.
– Осыған сәйкес, біз Орынбор облысы, Омбы және Астрахань қалаларында мектеп салуды ұсындық. Менің білуімше, Орынборда жер телімі бекітіліп қойған, ал Астрахань мен Омбыда жер телімін келісу жұмыстары жүргізіліп жатыр. Барлығы дайын болған кезде құжаттарға бір мезгілде қол қоямыз, – деді Серік Жұманғарин Жоғары Еуразиялық экономикалық кеңес отырысы қарсаңында.
Вице-премьердің сөзінше, Қазақстан мен Ресейде салынатын мектептер аралас форматта жұмыс істейді. Оқу үдерісі қазақ және орыс тілдерінде жүргізіледі.
– Бұл жоба жақын арада жүзеге аса бастайды. Келісімге қол қойылғаннан кейін мектептердің құрылысы басталады. Оларды бір жылдан бір жарым жылға дейінгі мерзімде салып бітіруге болады, – деді министр.
Айта кетейік, білім беру саласындағы Қазақстан мен Ресейдің ынтымақтастығы соңғы жылдары қарқынды дамып келеді. Екі ел бірлескен білім беру жобаларын жүзеге асырып, жаңа оқу орындарын салу бағытында жұмыс жүргізуде.