Қазақстанның бұрынғы премьер-министрі Асқар Маминнің жиендері Ернар мен Әлібек Маминдердің Лондонда жалпы құны 15,7 млн фунт стерлингке (шамамен 10,4 млрд теңге) бағаланатын екі пәтері бар. Бұл туралы бірқатар медиа мен зерттеу деректеріне сүйене отырып хабарланды.
Мәліметке сәйкес, пәтерлер Лондонның беделді Bayswater ауданында, Кенсингтон бақтары мен Гайд-паркке жақын орналасқан. Бұл аймақ посткеңестік елдердегі ауқатты тұлғалар арасында танымал аудандардың бірі саналады.
Құжаттарға қарағанда, апартаменттер ресми түрде Ернар мен Әлібек Маминдердің атына тіркелген. Алайда жылжымайтын мүлікке нақты бақылауды олардың әкесі, Асқар Маминнің туған інісі Марат Мамин сақтап отыр. Оның қолы қойылмайынша, пәтерлерді сату немесе жалға беру мүмкін емес.
Отбасы бұл жылжымайтын мүлікті Lancaster Gate тұрғын кешенінен сатып алған.
Бірінші пәтерді Марат Мамин 8,7 млн фунт стерлингке сатып алған. 2022 жылдың желтоқсанында бұл екі деңгейлі, төрт жатын бөлмесі бар пәтер оның кіші ұлы Әлібектің атына рәсімделген.
Бұған дейін, бір жыл бұрын, Марат Мамин дәл сол ғимараттан 7 млн фунт стерлингке тағы бір пәтер сатып алып, оны үлкен ұлы Ернардың атына жаздырған.
Сол кезеңде ағайындылар Лондонда тұрып, бірнеше бизнес жобамен айналысқанымен, кейін олардың компаниялары жабылған. Соған қарамастан, Марат Маминнің отбасы — өзі, жұбайы Гүлмира және екі ұлы — Ұлыбритания азаматтығын алған. Деректерге сәйкес, олар Қазақстан азаматтығынан ресми түрде бас тартқан.
Журналистік зерттеулерге сүйенсек, Қазақстанда бұл отбасының бизнесі сауда жылжымайтын мүлкі мен ойын-сауық саласына байланысты болған. Марат Мамин Астанадағы «Еуразия» сауда орталығын басқарған. Ал Ернар Мамин бірнеше компанияға иелік еткен.
Лондондағы жылжымайтын мүліктен бөлек, Марат Маминнің басқа елдерде де активтері бар. АҚШ-та, Орландо қаласының маңында, ол мен жұбайының атына көл жағасында орналасқан үлкен үй тіркелген. Сондай-ақ Майами маңындағы Aventura Marina Two тұрғын кешенінде ауданы 278 шаршы метр болатын пәтері бар.
Бұдан бөлек, журналистер Дубайдағы Al Bateen Residences кешенінде құны 1 млн доллардан асатын тағы бір пәтер Марат Маминнің атына тіркелгенін анықтаған.
Ал бұрынғы премьер-министр Асқар Маминнің атына қымбат шетелдік жылжымайтын мүлік туралы ашық деректерде ақпарат кездеспейді. Ол 2022 жылғы Қаңтар оқиғаларынан кейін саясаттан кетіп, қазіргі уақытта Қазақстан хоккей федерациясының басшысы қызметін атқарып жүр.