Мемлекеттік айыптаушы Берденовке жасалған шабуыл ісінде 11 жыл 3 ай түрме жазасын сұрады, деп хабарлайды bairak.kz.
Шымкент қаласы әкімінің орынбасары Руслан Берденовке жасалған қастандық ісі бойынша сот отырысында мемлекеттік айыптаушы айыпталушы Ернар Жиембайға 11 жыл 3 ай бас бостандығынан айыру жазасын тағайындауды сұрады.
Сотта алғашқы болып сөз алған мемлекеттік айыптаушы Бауржан Қараманов оқиғаның мән-жайын егжей-тегжейлі баяндады. Оның айтуынша, айыпталушының кінәсі көптеген дәлелдер мен куәгерлердің айғақтарымен расталған.
Прокурор жеңілдететін және ауырлататын мән-жайларға тоқталды. Жеңілдететін жағдай ретінде Жиембайдың кәмелетке толмаған балалары бар екені айтылса, қылмысты мас күйінде жасағаны ауырлататын мән-жай ретінде бағаланды.
Ернар Жиембайға Қылмыстық кодекстің екі бабы бойынша айып тағылып отыр:
-
99-бап, 1-бөлік – «Адам өлтіру»;
-
24-бап, 3-бөлік – «Қылмысқа дайындалу және адамның еркінен тыс жағдайларға байланысты аяқталмаған қылмысқа оқталу».