Қазақстанда вице-президент лауазымын енгізу мәселесі жаңа Құрылтай жасақталғаннан кейін қаралатын болады. Бұл туралы Сенат төрағасы Мәулен Әшімбаев мәлімдеді.
Оның айтуынша, аталған кадрлық және саяси шешім елдегі жаңа саяси құрылымның қалыптасуымен тікелей байланысты.
Өтпелі кезең аяқталғаннан кейін жаңа Парламент – Құрылтай жұмысын бастауы тиіс. Осыдан кейін Мемлекет басшысы тиісті шешім қабылдайды», – деді Сенат төрағасы.
Мәулен Әшімбаевтың айтуынша, жаңа Құрылтай құрамын 1 қыркүйекке дейін қалыптастыру жоспарланған.
Жаңа Конституциялық өзгерістерге сәйкес, вице-президент лауазымына кандидатураны Мемлекет басшысы ұсынады, алайда оны тағайындау Құрылтайдың келісімімен жүзеге асады. Бұл үшін депутаттардың көпшілік дауысы қажет.
Сонымен қатар, вице-президентті қызметінен босату құқығы да Президенттің құзыретінде қалады.
Сарапшылардың пікірінше, бұл институт мемлекеттік басқару жүйесін нақтылап, билік құрылымын тұрақтандыруға бағытталған.
Осылайша, вице-президентті тағайындау мәселесі саяси шешім деңгейінде емес, конституциялық рәсім аясында қарастырылып отыр.