Қарағандыдағы жекеменшік медицина колледжінің 30-ға жуық түлегі қорытынды мемлекеттік аттестациядан өте алмай, диплом ала алмайтын болды. Қолданыстағы ережеге сәйкес, олар емтиханды тек алты айдан кейін ғана қайта тапсыра алады. Бұл туралы КТК арнасы хабарлады.
Студенттер мен олардың ата-аналары емтихан нәтижелеріне күмән келтіріп отыр. Олардың айтуынша, жақсы оқыған әрі сынақ тестілерінде жоғары нәтиже көрсеткен түлектердің көбі шешуші кезеңде өтпей қалған. Кейбіріне өту баллына бір-ақ ұпай жетпеген.
Ата-аналардың бірі жағдайдың әділетсіз екенін айтып, наразылығын білдірді.
«10 баланың ішінде тек біреуі ғана өтті. Бұл сәттілікке байланысты болған сияқты. Ол 50 балл жинады. Ал менің балам 49 балл алды. Соған қарамастан оның оқу көрсеткіштері жақсы болды», – деді түлектің анасы Дидар Күлмағанбетова.
Колледж әкімшілігі мұндай жағдаймен алғаш рет бетпе-бет келгенін мәлімдеді. Олардың сөзінше, тестілеуден өте алмаған 30 студенттің басым бөлігі оқу барысында жақсы нәтиже көрсеткен.
Осыған байланысты оқу орны Ұлттық тәуелсіз емтихан орталығына сұраныс жолдап, тест тапсырмаларын қайта тексеруді сұраған. Колледж өкілдері кейбір сұрақтардың дұрыс құрастырылмауы немесе техникалық ақау болуы мүмкін екенін жоққа шығармайды.
Алайда Ұлттық тәуелсіз емтихан орталығы бұл уәждермен келіспейді. Орталықтың мәліметінше, тест сұрақтарын ғылыми қызметкерлер мен тәжірибелі дәрігерлер әзірлейді және нәтижелерді қайта қарауға негіз жоқ.
«Бірінші немесе екінші кезеңнен өте алмаған студент келесі кезеңге жіберілмейді. Ол емтиханды тек алты айдан кейін қайта тапсыра алады. Бұл талап қолданыстағы бұйрықта нақты көрсетілген. Қазіргі таңда біз ештеңе өзгерте алмаймыз», – деді Ұлттық тәуелсіз емтихан орталығы басқармасының жетекшісі Күлсара Досмамбетова.
Осылайша, биыл мамандық бойынша жұмысқа орналасуды жоспарлаған түлектер енді жарты жыл күтуге мәжбүр.