Танымал әнші Жеңіс Ысқақова отбасылық өміріне қатысты көпшілік біле бермейтін жайттарды айтып, ұлының екі рет шаңырақ көтергенін жеткізді. Өнер иесі сұхбат барысында ұлының алғашқы некесінің неліктен ұзаққа созылмағанын және қазіргі келінімен қарым-қатынасы қандай екенін әңгімеледі.
Жеңіс Ысқақованың айтуынша, ұлы алғаш рет үйленген кезде жас отбасы арасында бөлек тұру мәселесіне қатысты келіспеушілік болған. Алғашқы келіні жеке шаңырақ болып шыққысы келгенімен, әншінің ұлы ата-анасымен бірге тұруды жөн көрген. Ақырында осы мәселе екі жастың екі жаққа кетуіне себеп болған.
«Бірінші үйленгенде келін “бөлек шығайық” деген. Ұлым болса, “біз осы шаңырақта бірге тұрамыз, бөлек шықпаймыз” деп жауап берген», – деп еске алды әнші.
Өнер иесі сол кезде жастардың арасындағы мәселеге араласпағанын атап өтті. Оның сөзінше, өзі Астанада болғандықтан, ұлы мен келіні отбасылық жағдайды өзара шешкен.
Кейін Жеңіс Ысқақова бұрынғы келінімен жеке сөйлесіп, отбасының бұзылуына не себеп болғанын сұраған. Әншінің айтуынша, бұрынғы келіні оған ешқандай өкпе-реніші жоқ екенін жеткізген.
«Келгеннен кейін бұрынғы келіннен “Не болды, қандай жағдай болды?” деп сұрадым. Ол маған “Сізге ешқандай өкпем жоқ” деді», – деді өнер иесі.
Ал қазіргі келіні жайлы әнші ерекше ықыласпен әңгімеледі. Жеңіс Ысқақова оны еркелетіп «сәнім» деп атайтынын және келінімен бір шаңырақ астында тату-тәтті тұрып жатқанын айтты.
«Қазіргі келінімді “сәнім” деймін. Құдайдан сұрап алған келінім. Аллаға сансыз шүкір. Маңдайынан сүйіп отырамын, бірге тұрамыз», – деді Жеңіс Ысқақова.
Әншінің сөзінше, бүгінде өзі жас отбасыға бөлек шығуды ұсынса да, ұлы мен келіні бірге тұруды қалайды. Өнер иесі мұны отбасындағы өзара түсіністік пен сыйластықтың белгісі деп қабылдайтынын аңғартты.
Сонымен қатар Жеңіс Ысқақова шаңырақтың үлкені ретінде қажет кезде келініне ақыл-кеңесін айтып, кейбір мәселелерге қатысты ескерту жасайтынын жасырмады. Алғашқы кездері келіні мұндай сөздерді көңіліне алып, ренжіп, жылап қалған кездері де болған. Уақыт өте келе екеуінің арасында түсіністік қалыптасқан.
Осылайша, әнші ұлының алғашқы некесінің бұзылуына өзін себепкер санамайтынын, ал қазіргі келінімен арадағы қарым-қатынасына разы екенін жеткізді. Өнер иесі үшін бір шаңырақ астында өзара сыйластық пен түсіністікті сақтап өмір сүру маңызды екенін айтты.