Танымал әнші жұп Жанболат пен Жазира ұлының болашақ жары туралы жаңалықты көпшілікпен бөлісті.
Өнер иесі әлеуметтік желіде сүйінші жаңалығын жариялап, келінінің жүзін алғаш рет бейнебаян арқылы көрсеткенін айтты. Жазира Байырбекованың сөзінше, Жандос Қаржаубайдың әніне, Бақыт Қалибектің сөзіне жазылған «Бауырсағы балдай қыз» әні «Әгугәй» ансамблімен бірге түсірілген жаңа бейнебаянымен көрерменге жол тартқан.
«Ал, сүйінші! Келініміздің жүзін бейнебаянда көрсету — бір бөлек әсер. Жандос Қаржаубайдың әніне, Бақыт Қалибектің сөзіне жазылған «Бауырсағы балдай қыз” әні «Әгугәй» ансамблімен бірге түсірілген бейнебаянымен көрерменге жол тартты. Жаңа туындыны тамашалап, жақсы көңіл-күймен қабыл алыңыздар», – деп жазды өнер иесі.
Желі қолданушылары Жазираның келіні өзіне қатты ұқсайтынын айтып, жас жұпқа ақ тілектерін жаудырды.
Пікір қалдырған көпшілік:
«Жастар бақытты болсын!», «Құтты келін болсын!», «Жазираның өзінен аумайды екен!», «Жұғысты болсын ұлыма!» – деп жазды.