Бішкек қаласында Қырғызстан президенті Садыр Жапаров соңғы кадрлық шешімдерге қатысты түсініктеме берді. Бұл туралы ол Кабар агенттігіне берген сұхбатында айтты.
Президенттің сөзінше, ол Камчыбек Ташиевті вице-премьер-министр және Ұлттық қауіпсіздік мемлекеттік комитеті (ҰҚМК) төрағасы қызметінен босату туралы шешімді мемлекеттегі тұрақтылықты сақтау үшін қабылдаған.
Жапаровтың айтуынша, Ташиевтің айналасындағы кейбір адамдар оның атын пайдаланып, түрлі лауазымды тұлғаларға «Генерал жағына өтіңдер» деген үндеу тастаған. Бұл жағдай мемлекеттік аппарат пен қоғам арасында келіспеушілік туындатуы мүмкін болған.
— Мемлекеттегі тұрақтылық мен үшін бәрінен жоғары, — деді ол.
Президент бұл шешім туралы Ташиевке алдын ала хабарлап, жағдайды түсіндіргенін жеткізді. Оның айтуынша, бұл қадам елдің тыныштығы мен бірлігі үшін жасалған. Сонымен қатар, ол достық қарым-қатынас сақталатынын атап өтті.
Садыр Жапаров ҰҚМК-ні реформалау жоспарлары туралы да айтты. Оның сөзінше, орган өз міндетін орындағанымен, қазіргі жаһандық өзгерістер мен жаңа қауіп-қатерлерге байланысты кешенді жаңғырту қажет.
Президент кадрлық тағайындауларда ешқандай бөліну жоқ екенін, әр шешім мұқият сарапталатынын мәлімдеді. Сондай-ақ, заң бұзған кез келген мемлекеттік қызметкер жауапқа тартылатынын және заң алдында бәрі тең екенін атап өтті.