25 қыркүйектен бастап еліміздің бірқатар супермаркетінде ет өнімдері нарықтағыдан төмен бағада ұсынылатын арнайы орындар жұмыс істей бастайды. Бұл туралы Сауда және интеграция министрі Арман Шаққалиев мәлімдеді, деп хабарлайды bairak.kz.
Министрдің айтуынша, мұндай бастаманы ірі супермаркет желілері өздері көтеріп, әлеуметтік жауапкершіліктің үлгісін көрсеткен.
«Дүкендерде арнайы бұрыштар бөлініп, онда тікелей фермерлерден жеткізілген өнімдер сатылады. Заң бойынша үстемеақы 15%-дан аспайды», – деді Шаққалиев Үкіметтегі баспасөз мәслихатында.
Оның сөзінше, тұтынушыларға мұндай «әлеуметтік бұрыштар» бұрыннан таныс. Әлеуметтік-кәсіпкерлік корпорациялар арқылы ұйымдастырылған сөрелерде бағалар әрқашан нарықтан төмен болған.
Шаққалиевтің айтуынша, ұйымдастыру жұмыстары 23 қыркүйекте басталып, ал 25 қыркүйектен бастап супермаркет сөрелерінде арзан ет сатылымға шығарылады.